ব্লেক ফাংগাছৰ বিষয়ে কিছু কথা

কৰ'ণাৰ দ্বিতীয়টো ঢৌৰ মাজতে বিৰল কৃষ্ণ ভেকুঁৰ অৰ্থাৎ ব্লেক ফাংগাছ (Black Fungus) ৰোগবিধ এতিয়া চৰ্চাৰ কাৰণ হৈ পৰিছে । এই ৰোগ মিউকৰ অৰ্থাৎ ক’লা ভেকুঁৰৰ ফলত হয় । চিকিৎসা বিজ্ঞানৰ ভাষাত ইয়াক মিউকৰমাইক’চিচ (Mucormycosis) বোলা হয় । গুজৰাট, মহাৰাষ্ট্ৰ, অন্ধ্ৰপ্ৰদেশ, উত্তৰপ্ৰদেশ, বিহাৰ আৰু উৰিষ্যাৰ দৰে ৰাজ্যসমূহত ব্লেক ফাংগাছৰ কেইবাটাও ঘটনা পোহৰলৈ আহিছে । অসমতো ইতিমধ্যে প্ৰথমজন আক্ৰান্তৰ খবৰ স্থানীয় টিভি চেনেল, কাকত, সামাজিক মাধ্যম আদিত বহুলভাৱে প্ৰচাৰ হোৱা পৰিলক্ষিত হৈছে । আহঁকচোন জানি লওঁ এই ব্লেক ফাংগাছ ৰোগবিধনো কি ! সচাঁকৈয়ে ই মাৰাত্মক নে ? এই ৰোগ সংক্ৰামক হয় জানো ? ক'ভিড ৰোগীৰ সৈতে ব্লেক ফাংগাছৰ কি সম্পৰ্ক ?

ব্লেক ফাংগাছৰ কাৰক আৰু দেহত ইয়াৰ প্ৰৱেশ:

মিউকৰমাইক'চিচ অৰ্থাৎ ব্লেক ফাংগাছ নামৰ ৰোগবিধ এতিয়া ক'ভিডৰ সমান্তৰালভাৱে  ভাৰতবৰ্ষত চিকিৎসা যন্ত্ৰটোৰ বাবে এক নতুন প্ৰত্যাহবান স্বৰূপে থিয় দিছে । মিউকৰ অৰ্থাৎ ক'লা ভেকুঁৰৰ সংক্ৰমণৰ ফলত এই ৰোগবিধ হয় । এই ভেকুঁৰ সাধাৰণতে সেমেকাঁ মাটি, গছ-গছনি, সাৰ, পচাঁ ফল-মূল, শাক-পাচঁলি আদিত উৎপন্ন হয় । ইয়াৰ উপৰিও বতাহ আৰু পানীতো ইয়াৰ উপস্থিতি ধৰা পৰিছে । মাটিৰ সংস্পৰ্শত আহিলে এইবিধ ভেকুঁৰ নাক অথবা তেজৰ জৰিয়তে শৰীৰত প্ৰৱেশ কৰে । ইয়াৰ পাছত ই ছাল, হাওঁফাওঁ, চকু আৰু মগজুত ক্ৰিয়া কৰিবলৈ আৰম্ভ কৰে । এই ব্লেক ফাংগাছৰ প্ৰভাৱৰ ফলত মৃত্যুৰ হাৰ প্ৰায় ৫০% পৰ্যন্ত হোৱাৰ আশংকা থাকে । বহুক্ষেত্ৰত ব্লেক ফাংগাছৰ চিকাৰ হোৱা ৰোগীৰ আক্ৰান্ত চকু অথবা আন অংগ অস্ত্ৰোপচাৰৰ জৰিয়তে বাহিৰ কৰি দিবলগীয়া হয় ।
 
লক্ষণ:

এই ৰোগৰ সম্ভাৱ্য মূল লক্ষণ সমূহ হ'ল-
@নাক বন্ধ হোৱা
@নাকেৰে তেজ নিৰ্গত হোৱা
@চকু আৰু মুৰৰ বিষ
@চকু তথা মুখমণ্ডলৰ খজুৱতি
@চকুৰে ধুঁৱলি-কুঁৱলি দেখা
@দাতঁৰ বিষ আৰু
@তেজ বমি হোৱা
 
 
 
কৰ'ণা ৰোগীৰ সৈতে ব্লেক ফাংগাছৰ কি সম্পৰ্ক:

আচলতে ভাৰতবৰ্ষত সেইসকল লোকহে কৰ'ণাত অধিক আক্ৰান্ত হৈছে যিসকল পূৰ্বৰে পৰা ডায়বেটিছ অৰ্থাৎ মধুমেহ ৰোগত দীৰ্ঘদিন ধৰি ভূগি আছে অথবা অন্য কোনো বেমাৰৰ চিকিৎসাৰ বাবে ষ্টেৰয়ড গ্ৰহণ কৰি আছে । কৰ'ণা ভাইৰাছে আমাৰ দেহৰ প্ৰতিৰক্ষা তন্ত্ৰটোত পোনপটিয়াকৈ আক্ৰমণ কৰে যাৰ ফলত শৰীৰত পূৰ্বৰে পৰা থকা অন্য কিছুমান ৰোগ অধিক সক্ৰিয় হৈ পৰে । ষ্টেৰয়ডৰ প্ৰয়োগেও আমাৰ দেহৰ প্ৰতিৰক্ষা ব্যৱস্থাটোক যথেষ্ট পৰিমাণে দুৰ্বল কৰি পেলায় । প্ৰধানত: ৰোগ প্ৰতিৰোধ তন্ত্ৰটো দুৰ্বল হৈ পৰা আৰু শৰীৰত শৰ্কৰাৰ(চুগাৰ) পৰিমাণ বৃদ্ধি হোৱাৰ ফলত ব্লেক ফাংগাছে আক্ৰমণ কৰিবলৈ যথেষ্ট পৰিমাণে সুবিধা পায় ।

প্ৰতিকাৰ:

যিকোনা নতুন বেমাৰৰ নাম শুনিলেই আমি তাৎক্ষণিকভাৱে শংকিত হ'ব নালাগে । সজাগ হ'ব লাগে । বেমাৰ থাকিলে নিশ্চয় ইয়াৰ প্ৰতিকাৰ নতুবা দৰৱ থাকিবই । প্ৰথমতে কওঁ ব্লেক ফাংগাছ এবিধ বিৰল ৰোগ আৰু আন ৰোগৰ দৰে ই সংক্ৰামকো নহয় । গতিকে ভয়ৰ ইমান কাৰণ নাই ।
তথাপিও এই ৰোগৰ পৰা বাচি থাকিবলৈ হ'লে আমি কিছু সাৱধানতা অৱলম্বন কৰিব লাগিব । ঘৰৰ পৰা বাহিৰ ওলাওতে বায়ুমণ্ডলৰ ধূলি-মাকতি, ধোৱা আদিৰ পৰা হাত সাৰিবলৈ ফেচ মাস্ক ব্যৱহাৰ কৰিব লাগিব । মাটিৰে সম্পৰ্ক থকা কাম-কাজবোৰ কৰোতে আমি হেণ্ড গ্লোভ্জ অৰ্থাৎ হাতমোজা পৰিধান কৰিব লাগিব । ভালদৰে গা ধোৱা অভ্যাস কৰিব লাগিব তথা পৰিষ্কাৰ-পৰিচ্ছন্নতাৰ ওপৰত গুৰুত্ব দিব লাগিব। পৰিৱেশ তথা চৌপাশ আৱৰ্জনামুক্ত কৰি ৰাখিব লাগিব । আৰু আটাইতকৈ গুৰুত্বপূৰ্ণ কথাটো হ'ল চিকিৎসকৰ পৰামৰ্শমতে আমি দেহৰ প্ৰতিৰক্ষা ক্ষমতা অৰ্থাৎ ইমিউনিটি বৰ্দ্ধিত কৰিব পৰা খাদ্য, ফল-মূল, সেউজীয়া শাক-পাচলি আদি গ্ৰহণ কৰিব লাগিব । মনত ৰাখিব আপোনাৰ যদি ইমিউনিটি চিষ্টেম ভাল তেন্তে ক'ভিড, ব্লেক ফাংগাছৰ দৰে হাজাৰটা বেমাৰেও আপোনাৰ একো লৰাব নোৱাৰে । সকলো কুশলে থকাৰ কামনাৰে লিখনি ইমানতে সামৰিলো ।
 
জিয়াৰুল চৌধুৰী
গ্ৰন্থাগাৰিক, দিল্লী পাব্লিক স্কুল কামৰূপ
ফোন: ৭৮৯৬৭৫৪৭০০